الموضوع :- الاخوان والرئاسة 
ـــــــــــــــــــــــــــــــ
نرجع كده سنتين لما حصلت المشاكل اول ما المرشد السابق مهدي عاكف اعلن إنه مش هيكون مرشد للاخوان في سابقة هي الاولى من نوعها منذ تأسيس الجماعة وده حصل ان مهدي عاكف اصر على ان تواجده يكون لفترة علشان يسيب شباب الاخوان في المرحلة اللي جاية هما اللي ياخدو بإيد الجماعة وينهضوا بيها

لكن اللي حصل ان بديع لف على قرار مهدي عاكف وعمل جبهة اسمها جبهة المحافظين رد على جبهة الاصلاحيين اللي كان بيقودها محمد حبيب واللي انضم ليها عبدالمنعم ابوالفتوح

جماعة الاخوان رفضت إنها تدفع بمرشح للرئاسة بعد التنحي وتقريبا كانت مكتفية بموضوع البرلمان سواء شعب او شورى اللي حصل إن طلع ابوالفتوح وقال إنه هيرشح نفسه ومالوش دعوة بقرار الاخوان من موضوع الرئاسة راح الاستاذ الدكتور محمد بديع عمل زي اقتراع كده علشان يفصلوا ابوالفتوح من الجماعة وده ليه ؟؟ لانه خالف القرار 

والآن الجماعة تستعد لاعلان خيرت الشاطر مرشحا للرئاسة وده طبعا بعد ما المجلس العسكري تم اسقاط التهم عنه خلال الفترة التي قضاها في السجن 

تعليقي على جماعة دينية دعوية ترجع في كلامها 

** لا تعليق ** 

اسكتش مسرحي عن دور الام قبل واثناء وبعد الثورة

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

النوع الاول:- الام المصرية الاصيلة

الام:- ياابني قوم بقى ابوس إيدك المحاضرة هتفوتك ودي المراجعة قبل الامتحانات يمكن المدكتور يقول حاجة كده ولا كده تيجي في الامتحان الساعة بقت 8

الابن:- يصحى بتمهل ويبص للموبايل ويتصدم لما يلاقي الساعة 6ونص ويصرخ إييييه ده الساعة لسه 6ونص ينفع كده يعني إديكي ضيعتي عليا كام حلم كده

الام:- ياابني دي آخر سنة خلصها بقى باي شكل وشوف مستقبلك انا هروح اعملك كباية شاي واجهزلك الفطار على ما تغسل وشك

الابن :- (يتمتم) آل يعني خلاص المستقبل مستنيني علشان يكمل بيا ده لو ميكروباص كان سابني ومشي وجابله أي زبون من السكة

(على الفطار)

الام :- بيقولو في الاخبار الصبح ان الريس هيروح مجلس الشعب يفتتح الجلسة الاولى يعد الانتخابات خللي بالك بقى وانت رايح الجامعة الطريق اكيد هيبقى مقفول ومليان امن انا مش عارفة هو ليه يتعب نفسه ده راجل كبير معدي ال80 كان بعت ابنه احسن اهو بيساعده برضه

الابن:- وهو بيضحك ابنه إيه بس يا ماما ده لما واحد قاله شباب الفيس بوك ضحك وماعرفش يرد تلاقيه عمل لايك لكلنا خالد سعيد فالصفحة عملتلوا بلوك ولا تلاقي ماتلو 300 بقرة في المزرعة السعيدة

النوع الثاني:- الام المصرية أثناء الثورة

الام:- أخيييرا التلفون جمع من امبارح ونفسي اطمن عليك ياابني المهم انت كويس

الابن :- ماتقلقيش عليا ياماما انا كويس الحمد لله انا وصحابي قاعدين في الميدان جوا الصينية والناس بتحمينا المهم انتي عامله إيه أنا كان نفسي اروح امبارح بعد ما الجيش نزل بس بيني وبينك انا قلقت وقلت لازم نكون موجودين ونشوف هيعملوا إيه

الام:- ما تقلقش الجيش أكيد هيدافع عنكوا وعمرو ما هيضربكوا

الابن:- والله مش عارف ساعات أحس إنهم معانا وساعات أحس إنهم مش معانا ربنا يسهل والايام اللي جاية هنعرف هما مع مين

الام :- المهم انت موبايلك كده هيفصل شحن

الابن:- وهو يضحك ما تقلقيش عليا ياماما بالعكس ده هنا حبة كهربائية وربنا ناس كفاااائة عاملين أحلى شغل راحو خللوا عمدان النور شواحن للموبايلات لكل الانواع الناس دي فعلا بيعملوا الخير من غير مقابل

الام:- أهو ربنا يسترها عليكوا عرفت ان الريس هيقول خطاب جديد غير الاولاني تقريبا الموضوع كبر واحتمال يمشي

الابن:- مش عارف والله ياماما الناس هنا حاسة إن في حركة كده مش كويسة هيعملها أهو أدينا مستنيين

الام :- طب والنبي ياابني ابقى تعالى بكره ولو حبيت ترجع تاني براحتك بس ما تنساش وانت جاي تجيب معاك ب 3جنية عيش

الابن :- وهو يضحك عيييييييش يعني ما حصليش حاجة لغاية دلوقتي هنا عايزاني أموت في طابور العيش

الام:- وهي تضحك بعد الشر عليك ياحبيبي المهم تجيلي بالسلامة خللي بالك من نفسك

النوع الثالث:- أم الشهيد

الام وهي ثابتة ولكن دموع تنساب منها غصب عنها في الذكرى الاولى لوفاة ابنها وتقول لاخوها (خال الشهيد)

تفتكر هو دلوقتي عارف اللي حصل للبلد اللي نزلمع صحابو علشان يقولو كلمتهم ليها انا متأكده إنه لو يعرف اللي هيحصل ما كانش نزل

الخال:- ما تقوليش كده بالعكس ابنك عمل اللي احنا في سننا ما عرفناش نعملة او كان نفسنا نعمل زييه بس ماكانش فيه اللي يشجعنا

الام:- كان عندي أمل لما الجماعة اللي ماسكين البلد قالوا إنهم هيجيبوا حقوق الولاد اتعشمت فيهم خير وخصوصا بعد ما شفت منظر التحية العسكرية غصب عني دموعي نزلت وافتكرت انه بيعملها لابني لواحده بس خسارة 

الخال:- ما هو علشان كده الناس فهمت وعرفت إنهم عمرهم ما هيجيبوا حد لانهم مشتركين في الحكاية من أولها

الام:- طب واللي قتل ابني عارف ينام ؟ احساسه إيه لما يرجع لاهلة ولولاده وهو بايده قنص ابني ؟ (وتمسك بتقرير الطب الشرعي اللي بيوضح فيه ان ابنها استشهد قنصا في مساء يوم موقعة الجمل)

الخال:- ربنا هياخدلك حقك منه

الام:- الحق عند ربنا مش بيضيع بس حق ابني عند الناس ضاع  وتتذكر الاحداث بدءأ من احداث مسرح البالون 

الذكريات مع اضاءة خافتة 

مسرح البالون ماسكة صورة ابنها وبتطالب بحقه

أول جلسة لمحاكمة ماسكة مبارك صورة ابنها وبتطالب بحقه

أحداث محمد محمود ( كانت من المعتصمين المطالبين بحق ابنها ) ماسكة صورة ابنها وبتطالب بحقه

أحداث مجلس الوزراء ماسكة صورة ابنها وبتطالب بحقه

الذكرى الاولى للثورة ماسكة صورة ابنها وبتطالب بحقه

الذكرى الاولى لاستشهاده مازالت ماسكة صورة ابنها وبتطالب بحقه

اسدال الستار مع موسيقى تعبيرية

الوصف الكامل لقضية التمويل والمنظمات الاهلية

الوصف الكامل لقضية التمويل والمنظمات الاهلية 
ـــــــــــــــــــــــــــــــــــــــــــــــــــــــــــــــــــــ

الحكومة ممثلة في الجنزوري وفايزة ابو النجا والمجلس العسكري الممثل في المشير حبوا يعملوا زي قرصة ودن كده للمنظمات الحقوقية والجمعيات الاهلية لانهم كانوا بيكشفوا فسادهم سواء في موضوع اسر الشهداء والمصابين او في موضوع الانتخابات فقالوا احنا لازم نخلص على الجمعيات دي خصوصا إن من ضمنهم مركز استقلال القضاء الخاص ب ناصر أمين واللي رافع قضية ضد واحد من رجالتنا ((مصطفى بكري)) المهم لما عملوا المداهمات ومسكوا ناس وقعدوا يحققوا كانوا مصدعيننا في التلفزيون بحق السيادة الدولية وان مصر لن تقبل مساعدات لجمعيات اهلية ممكن تخرب البلد وخلافه 

الموضوع اتطور وهما مش واخدين بالهم لما اكتشفوا إن في ناس أمريكان ((تقيلة)) مشدودين في الموضوع خاصة إن الموضوع دخل النيابة ولازم محكمة وخلافه ومع اول جلسة للمحكمة وبعديها بكام يوم حصل ما يسمى بالتخلف الاداري اللي بصراحة يبين ان المجلس العسكري لا يصلح لادارة شؤون الجيش نفسة وده لانهم صرحوا في اول الموضوع إن الموضوع سيادي وحق الدولة ولا راد لحكم القضاء ولما أمريكا قالتلهم ما يصحش كده ورئيس الاركان جي وزار مصر واجتمع مع طنطاوي وعنان الموضوع اتغير 180 درجة لدرجة انهم يصرحوا ان الموضوع سياسي فقط والامور بسيطة وخلافه 

نستنتج من الموضوع اللي فات ده 4 حاجات:-

1- الحكومة والمجلس العسكري عايزين يشدوا ناس في الموضوع خاصة إنهم بيكتشوا فساد الحكومة والمجلس 

2- الحكومة والمجلس العسكري اكتشفوا ((بالصدفة)) إن من ضمن الناس اللي اتشدوا ناس أمريكان (( تقيلة ف أمريكا ))

3- الحكومة والمجلس العسكري استجابوا (( ركعوا )) لإرادة الادارة الامريكية في منع حظر السفر الخاص بمواطنيهم 

4- الحكومة والمجلس العسكري ضربوا عصفورين بحجر واحد إنهم يغلقوا المنظمات والجمعيات دي لما تروح القضية لدائرة تانية ويتحكم فيها ( غالبا باغلاقها ومصادرة اموالها وممتلكاتها ) وانهم ما يخسروش العلاقات الامريكية سواء بالمعونة او العلاقات الاخرى 

آخر كلمة:- عندما نجد بعد كل ما حدث أن أول تعليق رسمي لواشنطن هو ان القضاء المصري مستقل والحكومة الامريكية لم تدفع رشوة أو كفالة فإننا نجد أمامنا أما كلمة واحدة 

** لا تعليق **